कोवाडे ता.आजरा येथील घटना

सिरसंगी प्रतिनिधी :
कोवाडे (ता. आजरा) येथे चुलतीच्या रक्षाविसर्जनाच्या दिवशीच आई आणि मुलीचे निधन झाल्याची हृदयद्रावक घटना घडली. या दुर्दैवी घटनेमुळे होडगे कुटुंबावर दुःखाचा डोंगर कोसळला असून, कोवाडेसह परिसरात हळहळ व्यक्त होत आहे.
कोवाडे येथील हिराबाई विठोबा होडंगे (वय ८५) यांचे अल्पशा आजाराने १० नोव्हेंबर रोजी निधन झाले होते. शुक्रवारी (दि. १३) त्यांच्या रक्षाविसर्जनाचा कार्यक्रम होता. याच दिवशी हिराबाई यांच्या जाऊ तानुबाई दत्तात्रय होडगे (वय ९०) यांचेही निधन झाले. दरम्यान, तानुबाई यांच्या अंत्यविधीसाठी आलेल्या त्यांची होणेवडी येथील मुलगी पार्वती जानू पाटील (वय ६५) यांना हृदयविकाराचा झटका आल्याने त्यांचाही मृत्यू झाला.
एकाच दिवशी मायलेकींचे निधन झाल्याने होडगे कुटुंबीयांवर दुःखाचा मोठा आघात झाला आहे. चुलतीच्या रक्षाविसर्जनाच्या दिवशीच मायलेकींचा मृत्यू झाल्याने कोवाडे व परिसरातून हळहळ व्यक्त होत आहे.
हिराबाई विठोबा होडगे या भादवण (ता. आजरा) येथील सातेरी पतसंस्थेचे व्यवस्थापक परशराम विठोबा होडगे यांच्या मातोश्री होत. तर तानुबाई दत्तात्रय होडगे या आजरा साखर कारखान्याचे कर्मचारी सुभाष दत्तात्रय होडगे यांच्या मातोश्री होत.













