सिरसंगी प्रतिनिधी :
गणरायाच्या आगमनाने आजरा तालुक्यातील सिरसंगी, किणे, वाटंगी, कोळींद्रे परिसरात भक्तिमय आणि उत्साहाचे वातावरण निर्माण झाले आहे. ‘गणपती बाप्पा मोरया, मंगलमूर्ती मोरया’च्या जयघोषात ठिकठिकाणी गणेशमूर्तींची प्रतिष्ठापना करण्यात आली.
गणेशोत्सवानिमित्त घरगुती तसेच सार्वजनिक मंडळांच्या वतीने आकर्षक सजावट करण्यात आली असून, विविध ठिकाणी विद्युत रोषणाई आणि देखावे उभारण्यात आले आहेत. गणेशमूर्ती घेऊन जाण्यासाठी सकाळपासूनच नागरिकांची लगबग सुरू होती. ढोल-ताशांच्या गजरात, गुलालाची उधळण करत आणि बाप्पाचा जयघोष करत गणरायाचे उत्साहात स्वागत करण्यात आले.
सिरसंगी, किणे, वाटंगी आणि कोळींद्रे परिसरातील विविध गावांमध्ये गणेशोत्सवाच्या पार्श्वभूमीवर मंडळांनी धार्मिक, सांस्कृतिक तसेच सामाजिक उपक्रमांचे आयोजन केले आहे. लहानांपासून ज्येष्ठांपर्यंत सर्वच वयोगटातील नागरिकांमध्ये गणेशोत्सवाचा उत्साह पाहायला मिळत आहे.
गणेशोत्सव काळात गावागावांत विविध कार्यक्रमांचे आयोजन करण्यात येणार असून, आरती, भजन, प्रवचन, सांस्कृतिक कार्यक्रम तसेच सामाजिक उपक्रमांमुळे पुढील काही दिवस परिसरात उत्सवी वातावरण राहणार आहे.
By
